JON SIGURDUR

dýpt mannhafsins

 

 

sjór-

það er ekki sami sjórinn í Miðjarðarhafinu

og firðinum heima

 

vinur-

og vinur sem þú mætir á torgi

er ekki sá sami og þú mætir í stofunni heima

 

á-

og ekki er það sama áin sem þú stígur í með hægra fæti

og þeim vinstri

 

föstudagur-

og ekkert er líkt með föstudegi að vori

og föstudegi í desember

 

koss-

ekkert er líkt með kveðjukossi

og kossi á munninn korteri fyrir lokun

 

lausn-

og ekkert vandamál hefur sömu lausnina

 

vín-

ekkert er líkt með því víni sem þú drekkur með vinum

og víni sem þú drekkur einn í vari fyrir veröld

 

myrkur-

ólíkt er næturmyrkrið

morgunmyrkrinu

 

klukknahljómur-

og aldrei koma sömu hljóð úr kirkjuklukkunni

​

en svona skýlir margbreytileikinn sér undir sama orðinu